SUDDILIVE || SHIVAMOGGA
ಶಿವಮೊಗ್ಗದಲ್ಲಿ ಹಣಕ್ಕಾಗಿ ಎಸ್‌ಡಿಪಿಐ ಜಿಲ್ಲಾ ಸಮಿತಿಯ ಸದಸ್ಯರ ಮೇಲೆ ಚಾಕುವಿನಿಂದ ಹಲ್ಲೆ- SDPI district committee member attacked with knife over money in Shimoga 
ಹಣ ನೀಡುವಂತೆ ಬೆದರಿಕೆ ಹಾಕಿ, ಬಳಿಕ ಟಿಪ್ಪುನಗರ ಚಾನಲ್ ಸಮೀಪ ವ್ಯಕ್ತಿಯೊಬ್ಬರ ಮೇಲೆ ಗುಂಪು ಹಲ್ಲೆ ನಡೆಸಿ ಚಾಕುವಿನಿಂದ ಇರಿಯಲು ಯತ್ನಿಸಿದ ಆರೋಪದ ಮೇಲೆ ತುಂಗಾನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಹಲ್ಲೆಯಲ್ಲಿ ಎಸ್‌ಡಿಪಿಐ ಜಿಲ್ಲಾ ಸಮಿತಿ ಸದಸ್ಯ ಇಸಾಕ್ ಅಹಮದ್ ಹಾಗೂ ಮನ್ಸೂರ್ ಗಾಯಗೊಂಡಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಅಕ್ಟೋಬರ್ 24ರಂದು ಮಧ್ಯಾಹ್ನ 2 ಗಂಟೆಯಿಂದ 2.10ರ ನಡುವಿನ ಅವಧಿಯಲ್ಲಿ ಶಿವಮೊಗ್ಗದ ಟಿಪ್ಪುನಗರ ಚಾನಲ್ ಸಮೀಪದ ಚಿಪ್ಸ್ ಅಂಗಡಿಯ ಎದುರು ಈ ಘಟನೆ ನಡೆದಿದೆ ಎಂದು ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ.
₹50 ಸಾವಿರ ನೀಡುವಂತೆ ಬೆದರಿಕೆ ಹಾಕಿದ ಆರೋಪ
ದೂರಿನ ಪ್ರಕಾರ, ಎಸ್‌ಡಿಪಿಐ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಇಮ್ರಾನ್ ಅಹಮದ್ ಅವರಿಗೆ ಅಂದು ಬೆಳಗ್ಗೆಯಿಂದಲೇ ಶೋಯೆಬ್ ಹಾಗೂ ಆತನ ಸಂಗಡಿಗರು ದೂರವಾಣಿ ಕರೆ ಮಾಡಿ ₹50,000 ನೀಡುವಂತೆ ಬೆದರಿಕೆ ಹಾಕುತ್ತಿದ್ದರು ಎನ್ನಲಾಗಿದೆ. ಈ ವಿಷಯವನ್ನು ಇಮ್ರಾನ್ ಅವರು ಬೈಪಾಸ್ ರಸ್ತೆಯಲ್ಲಿರುವ ಎಸ್‌ಡಿಪಿಐ ಕಚೇರಿಯಲ್ಲಿ ನಡೆದ ಸಭೆಯ ಸಂದರ್ಭದಲ್ಲಿ ಇಸಾಕ್ ಅಹಮದ್ ಸೇರಿದಂತೆ ಇತರರಿಗೆ ತಿಳಿಸಿದ್ದರು.
ಸಭೆ ಮುಗಿದ ಬಳಿಕ ಶೋಯೆಬ್ ಮಾತನಾಡಲು ಟಿಪ್ಪುನಗರ ಚಾನಲ್ ಸಮೀಪ ಬರುವಂತೆ ತಿಳಿಸಿದ್ದಾನೆ ಎಂದು ಇಮ್ರಾನ್ ಮಾಹಿತಿ ನೀಡಿದ್ದರು. ಅದರಂತೆ ಮಧ್ಯಾಹ್ನ 2 ಗಂಟೆ ಸುಮಾರಿಗೆ ಇಮ್ರಾನ್, ಇಸಾಕ್ ಅಹಮದ್, ಮನ್ಸೂರ್ ಹಾಗೂ ಜಿಲಾನ್ ಟಿಪ್ಪುನಗರ ಚಾನಲ್ ಬಳಿಗೆ ತೆರಳಿದ್ದರು.
ಮನ್ಸೂರ್ ಮೇಲೆ ಮೊದಲು ಹಲ್ಲೆ
ಟಿಪ್ಪುನಗರ ಚಾನಲ್ ಬಳಿಯ ಚಿಪ್ಸ್ ಅಂಗಡಿ ಎದುರು ಶೋಯೆಬ್, ಫರಾಜ್, ಜಿಶಾನ್, ಬಿಂಗಿ ಹಾಗೂ ಅವರೊಂದಿಗೆ ಇದ್ದ ಇತರರು ಸೇರಿ ಮನ್ಸೂರ್ ಮೇಲೆ ಕೈಗಳಿಂದ ಹಲ್ಲೆ ನಡೆಸಿದ್ದಾರೆ.
ಈ ವೇಳೆ ಇಮ್ರಾನ್ ಮತ್ತು ಜಿಲಾನ್ ಮಧ್ಯಪ್ರವೇಶಿಸಿ ಹಲ್ಲೆಯನ್ನು ತಡೆಯಲು ಮುಂದಾಗಿದ್ದರು. ಹಣ ಕೇಳಿದವರು ಯಾರು ಎಂದು ಇಮ್ರಾನ್ ಪ್ರಶ್ನಿಸಿದಾಗ, ಅಲ್ಲಿದ್ದ ವ್ಯಕ್ತಿಯೊಬ್ಬ ತಾನೇ ಶೋಯೆಬ್ ಎಂದು ಹೇಳಿಕೊಂಡಿದ್ದಾಗಿ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಬಳಿಕ ಆರೋಪಿತರು ನಾಲ್ವರ ಮೇಲೂ ಹಲ್ಲೆ ನಡೆಸಿ, ತಳ್ಳಾಡಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಚಾಕುವಿನಿಂದ ಹಲ್ಲೆ, ಕುತ್ತಿಗೆಯ ಹಿಂಭಾಗಕ್ಕೆ ಗಾಯ
ಈ ಸಂದರ್ಭದಲ್ಲಿ ಶೋಯೆಬ್ ಇಮ್ರಾನ್ ಅವರ ಮೇಲೆ ಚಾಕುವಿನಿಂದ ಹಲ್ಲೆ ಮಾಡಲು ಮುಂದಾಗಿದ್ದಾನೆ. ಇಮ್ರಾನ್ ತಪ್ಪಿಸಿಕೊಂಡಿದ್ದಾರೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.
ನಂತರ ಫರಾಜ್ ತನ್ನ ಬಳಿಯಿದ್ದ ಚಾಕುವಿನಿಂದ ಹಲ್ಲೆ ಮಾಡಲು ಮುಂದಾಗಿ, ಹಣ ಕೇಳಿದರೆ ನೀಡಲು ಸಾಧ್ಯವಿಲ್ಲವೇ ಎಂದು ಪ್ರಶ್ನಿಸಿ, ಅಲ್ಲಿಂದ ಯಾರೂ ಮನೆಗೆ ಹೋಗುವುದಿಲ್ಲ ಎಂದು ಜೀವ ಬೆದರಿಕೆ ಹಾಕಿದ್ದಾನೆ ಎನ್ನಲಾಗಿದೆ.
ಫರಾಜ್ ಚಾಕುವಿನಿಂದ ಇಸಾಕ್ ಅಹಮದ್ ಅವರ ಕುತ್ತಿಗೆಯ ಹಿಂಭಾಗಕ್ಕೆ ಹೊಡೆಯಲು ಮುಂದಾದಾಗ ಅವರು ತಪ್ಪಿಸಿಕೊಳ್ಳಲು ಯತ್ನಿಸಿದ್ದು, ಈ ವೇಳೆ ಚಾಕು ತಾಗಿ ತಲೆಯ ಹಿಂಭಾಗದ ಮೇಲ್ಭಾಗದಲ್ಲಿ ರಕ್ತಗಾಯವಾಗಿದೆ ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಗಾಯಗೊಂಡ ಇಸಾಕ್ ಅವರನ್ನು ಇಮ್ರಾನ್ ಮತ್ತು ಜಿಲಾನ್ ಅವರು ಮೆಗ್ಗಾನ್ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಮನ್ಸೂರ್ ಅವರ ಮೇಲೂ ಕೈಗಳಿಂದ ಹಲ್ಲೆ ನಡೆದಿದ್ದು, ಅವರನ್ನೂ ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ.
ಹಲ್ಲೆಯ ಬಳಿಕ ಆರೋಪಿತರು ಮತ್ತೊಮ್ಮೆ ಸಿಕ್ಕರೆ ಜೀವಂತವಾಗಿ ಬಿಡುವುದಿಲ್ಲ ಎಂದು ಬೆದರಿಕೆ ಹಾಕಿ ಸ್ಥಳದಿಂದ ತೆರಳಿದ್ದಾರೆ ಎಂದು ದೂರುದಾರರು ಆರೋಪಿಸಿದ್ದಾರೆ.
ಒಂಬತ್ತು ಬಿಎನ್‌ಎಸ್ ಕಲಂಗಳಡಿ ಪ್ರಕರಣ ದಾಖಲು
ಗಾಯಾಳು ಇಸಾಕ್ ಅಹಮದ್ ಅವರು ಮೆಗ್ಗಾನ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಸಂದರ್ಭದಲ್ಲಿ ನೀಡಿದ ಹೇಳಿಕೆಯ ಆಧಾರದಲ್ಲಿ ತುಂಗಾನಗರ ಪೊಲೀಸ್ ಠಾಣೆಯಲ್ಲಿ ಅಪರಾಧ ಸಂಖ್ಯೆ 686/2026ರ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಶೋಯೆಬ್, ಫರಾಜ್, ಜಿಶಾನ್, ಬಿಂಗಿ ಹಾಗೂ ಅವರೊಂದಿಗೆ ಇದ್ದ ಇತರರ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (ಬಿಎನ್‌ಎಸ್), 2023ರ ಕಲಂ 189(2), 191(2), 352, 115(2), 118(1), 308(2), 109, 351(3) ಮತ್ತು 190ರ ಅಡಿಯಲ್ಲಿ ಪ್ರಕರಣ ದಾಖಲಿಸಿರುವುದಾಗಿ ಎಫ್‌ಐಆರ್‌ನಲ್ಲಿ ತಿಳಿಸಲಾಗಿದೆ.
ಪ್ರಕರಣದ ತನಿಖೆ ಮುಂದುವರಿದಿದೆ. ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಿರುವ ಆರೋಪಗಳು ತನಿಖೆಗೆ ಒಳಪಟ್ಟಿದ್ದು, ಆರೋಪ ಸಾಬೀತಾಗುವವರೆಗೆ ಆರೋಪಿತರು ನಿರ್ದೋಷಿಗಳೆಂದು ಪರಿಗಣಿಸಲ್ಪಡುತ್ತಾರೆ.
ಗೋವಿಂದಾಪುರದಲ್ಲಿ ಮನೆ ಕಟ್ಟಲು ಮುಂದಾದ ಇಮ್ರಾನ್ ಅವರನ್ನ ಗಮನಿಸಿದ್ದ ಶೋಯೆಬ್ ಗ್ಯಾಂಗ್ ಈತನ ಬಳಿ ಹಣವಿರಬಹುದು ಎಂದು ಭಾವಿಸಿ ಬೆನ್ನುಬಿದ್ದಿದೆ. ಅಲ್ಲಿಂದ ಇಮ್ರಾನ್ ಗೆ ಹಣಕೊಡುವಂತೆ ಬೆನ್ನುಬಿದ್ದಿರುವ ಶೋಯೆಬ್ ಮತ್ತು ತಂಡ ಅ.24 ರಂದು ಬೆನ್ನುಬಿದ್ದಿದೆ.
