SUDDILIVE || SHIVAMOGGA
ಶಿವಮೊಗ್ಗದ ವೈನ್‌ಸ್ಟೋರ್‌ನಲ್ಲಿ ಪುಂಡಾಟ! ಮದ್ಯ ಕೊಡದಿದ್ದಕ್ಕೆ ಮಾಲೀಕನ ತಲೆಗೆ ಗ್ಲಾಸ್‌ನಿಂದ ಹೊಡೆದು ರಕ್ತಗಾಯ!Riot at a wine store in Shivamogga! Owner hit on the head with a glass for not serving alcohol, causing a bloody wound!
ಶಿವಮೊಗ್ಗ: ಹಣ ನೀಡದೆ ಮದ್ಯ ಕೇಳಿ, ಹಣ ಕೊಟ್ಟು ತೆಗೆದುಕೊಂಡು ಹೋಗುವಂತೆ ಹೇಳಿದ್ದಕ್ಕೆ ವೈನ್‌ಸ್ಟೋರ್ ಮಾಲೀಕನ ಮೇಲೆ ಹಲ್ಲೆ ನಡೆಸಿ, ಅಂಗಡಿಗೆ ಬೆಂಕಿ ಹಚ್ಚುವುದಾಗಿ ಬೆದರಿಕೆ ಹಾಕಿರುವ ಘಟನೆ ಶಿವಮೊಗ್ಗ ನಗರದ ದುರ್ಗಿಗುಡಿ ಮುಖ್ಯರಸ್ತೆಯ ವೆಂಕಟೇಶ್ವರ ವೈನ್ಸ್‌ನಲ್ಲಿ ನಡೆದಿದೆ.
ಘಟನೆಯಲ್ಲಿ ವೈನ್‌ಸ್ಟೋರ್ ಮಾಲೀಕ ಉಮೇಶ್ (46) ಎಂಬುವವರಿಗೆ ತಲೆಗೆ ರಕ್ತಗಾಯವಾಗಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಚಿನ್ ಶ್ಯಾಡೋ ಮತ್ತು ಪ್ರಶಾಂತ್ ಅಲಿಯಾಸ್ ಪಾಪ ಎಂಬುವವರ ವಿರುದ್ಧ ದೊಡ್ಡಪೇಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಮದ್ಯ ಕೇಳಿ ಗಲಾಟೆ ಆರಂಭ
ಪೊಲೀಸ್ ದೂರಿನ ಪ್ರಕಾರ, ಉಮೇಶ್ ಅವರು ಕಳೆದ ಎರಡು ವರ್ಷಗಳಿಂದ ದುರ್ಗಿಗುಡಿಯ ವೆಂಕಟೇಶ್ವರ ವೈನ್ಸ್ ಅನ್ನು ಲೀಸ್‌ಗೆ ಪಡೆದು ವ್ಯಾಪಾರ ನಡೆಸುತ್ತಿದ್ದಾರೆ. ಅಕ್ಟೋಬರ್ 28ರಂದು ಸಂಜೆ ಸುಮಾರು 5 ಗಂಟೆಯ ವೇಳೆಗೆ ಉಮೇಶ್ ಹಾಗೂ ಸಿಬ್ಬಂದಿ ಮಲ್ಲಿಕಾರ್ಜುನ, ವಿನಾಯಕ ಅವರು ಅಂಗಡಿಯಲ್ಲಿ ವ್ಯಾಪಾರ ಮಾಡುತ್ತಿದ್ದಾಗ ಸಚಿನ್ ಶ್ಯಾಡೋ ಮತ್ತು ಪ್ರಶಾಂತ್ ಅಲ್ಲಿಗೆ ಬಂದಿದ್ದಾರೆ.
ಮದ್ಯ ನೀಡುವಂತೆ ಕೇಳಿದಾಗ, ಹಣ ಕೊಟ್ಟು ತೆಗೆದುಕೊಂಡು ಹೋಗುವಂತೆ ಉಮೇಶ್ ತಿಳಿಸಿದ್ದಾರೆ. ಇದರಿಂದ ಆಕ್ರೋಶಗೊಂಡ ಆರೋಪಿಗಳು ಅವಾಚ್ಯ ಶಬ್ದಗಳಿಂದ ನಿಂದಿಸಿ, 'ನಾವು ಯಾರು ಗೊತ್ತಾ? ನಾವು ಕೇಳಿದಾಗ ಮದ್ಯ ಕೊಡಬೇಕು' ಎಂದು ಗಲಾಟೆ ಮಾಡಿದ್ದಾರೆ ಎನ್ನಲಾಗಿದೆ.
ಗ್ಲಾಸ್‌ನಿಂದ ತಲೆಗೆ ಹೊಡೆದು ಹಲ್ಲೆ
ದೂರಿನಲ್ಲಿ ಉಲ್ಲೇಖಿಸಿರುವಂತೆ, ಮದ್ಯ ನೀಡದಿದ್ದರೆ ಅಂಗಡಿಗೆ ಬೆಂಕಿ ಹಚ್ಚುವುದಾಗಿ ಆರೋಪಿಗಳು ಬೆದರಿಕೆ ಹಾಕಿದ್ದಾರೆ. ಈ ವೇಳೆ ಸಚಿನ್ ಶ್ಯಾಡೋ ಎಂಬಾತ ಅಂಗಡಿಯ ಮುಂಭಾಗದ ಟೇಬಲ್ ಮೇಲಿದ್ದ ಗ್ಲಾಸ್ ಹಾಗೂ ಫೋನ್‌ಪೇ ಸ್ಕ್ಯಾನರ್‌ನಿಂದ ಉಮೇಶ್ ಅವರ ಮೇಲೆ ಹಲ್ಲೆ ನಡೆಸಿದ್ದಾನೆ ಎನ್ನಲಾಗಿದೆ. ಗ್ಲಾಸ್ ಮತ್ತು ಸ್ಕ್ಯಾನರ್ ಬಲಭಾಗದ ತಲೆಗೆ ಬಡಿದು ರಕ್ತಗಾಯವಾಗಿದೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ತಕ್ಷಣ ಉಮೇಶ್ ಅವರು ಪೊಲೀಸರಿಗೆ ಕರೆ ಮಾಡಿದ್ದು, ಪೊಲೀಸರು ಬರುತ್ತಾರೆ ಎಂದು ತಿಳಿದ ಆರೋಪಿಗಳು, 'ಮದ್ಯ ಕೇಳಿದರೂ ಕೊಡಲಿಲ್ಲ, ನೀನು ಹೇಗೆ ವ್ಯಾಪಾರ ಮಾಡುತ್ತೀಯೋ ನೋಡುತ್ತೇವೆ' ಎಂದು ಬೆದರಿಕೆ ಹಾಕಿ ಸ್ಥಳದಿಂದ ಪರಾರಿಯಾಗಿದ್ದಾರೆ ಎನ್ನಲಾಗಿದೆ.
ದೊಡ್ಡಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲು
ಗಾಯಗೊಂಡ ಉಮೇಶ್ ಅವರು ಮೆಗ್ಗಾನ್ ಆಸ್ಪತ್ರೆಗೆ ತೆರಳಿ ಚಿಕಿತ್ಸೆ ಪಡೆದ ಬಳಿಕ ದೊಡ್ಡಪೇಟೆ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಅಕ್ಟೋಬರ್ 28ರಂದು ದಾಖಲಾದ ದೂರಿನ ಆಧಾರದಲ್ಲಿ ದೊಡ್ಡಪೇಟೆ ಪೊಲೀಸರು ಅಪರಾಧ ಸಂಖ್ಯೆ 355/2026ರ ಅಡಿಯಲ್ಲಿ ಭಾರತೀಯ ನ್ಯಾಯ ಸಂಹಿತೆಯ ಕಲಂ 352, 118(1), 351(2) ಹಾಗೂ 3(5)ರಂತೆ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.
ಘಟನೆಯ ಕುರಿತು ದೂರುದಾರರು ನೀಡಿರುವ ಆರೋಪಗಳ ಆಧಾರದಲ್ಲಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
Riot at a wine store in Shivamogga! Owner hit on the head with a glass for not serving alcohol, causing a bloody wound!
