SUDDILIVE || SHIVAMOGGA
ಪಥಸಂಚಲನಕ್ಕೆ ಅನುಮತಿ ವಿಚಾರದಲ್ಲಿ ಸರ್ಕಾರದೊಂದಿಗೆ ಸಂಘರ್ಷ ಬೇಡ, ನಿಯಮ ಪಾಲಿಸಿ ಮುನ್ನಡೆಯುತ್ತೇವೆ – ಮಧುಕರ್-We do not want a confrontation with the government regarding permission for the march; we will proceed by adhering to the rules – Madhukar
ಶಿವಮೊಗ್ಗ: ಆರ್‌ಎಸ್‌ಎಸ್ ಪಥಸಂಚಲನಕ್ಕೆ ಅನುಮತಿ ಪಡೆಯುವ ವಿಚಾರದಲ್ಲಿ ಸರ್ಕಾರದೊಂದಿಗೆ ಸಂಘರ್ಷಕ್ಕೆ ಇಳಿಯುವ ಉದ್ದೇಶವಿಲ್ಲ. ಸರ್ಕಾರ ರೂಪಿಸಿರುವ ನಿಯಮಗಳನ್ನು ಪಾಲಿಸಿಕೊಂಡು ಮುನ್ನಡೆಯುತ್ತೇವೆ. ಆದರೆ ಪಥಸಂಚಲನಕ್ಕೆ ಅನುಮತಿ ಮತ್ತು ಭದ್ರತೆ ಹೆಸರಿನಲ್ಲಿ ಶುಲ್ಕ ವಿಧಿಸುವುದು ಎಷ್ಟು ಸರಿ ಎಂಬ ಪ್ರಶ್ನೆಯನ್ನೂ ಎತ್ತುತ್ತಿದ್ದೇವೆ ಎಂದು ಆರ್‌ಎಸ್‌ಎಸ್ ಮುಖಂಡ ಮಧುಕರ್ ಹೇಳಿದರು.
ಶಿವಮೊಗ್ಗದಲ್ಲಿ ಆರ್‌ಎಸ್‌ಎಸ್ ಶತಾಬ್ದಿ ಕಾರ್ಯಕ್ರಮಗಳ ಕುರಿತು ಮಾಧ್ಯಮಗಳೊಂದಿಗೆ ನಡೆದ ಸಂವಾದದಲ್ಲಿ ಮಾತನಾಡಿದ ಅವರು, ಪಥಸಂಚಲನಕ್ಕೆ ಅನುಮತಿ ಪಡೆಯುವ ವಿಚಾರ, ಸಂಘದ ಕಾರ್ಯವೈಖರಿ, ಜಾತೀಯತೆ ನಿರ್ಮೂಲನೆ, ಭಾರತೀಯ ರಾಷ್ಟ್ರೀಯತೆಯ ಕಥನ ಸೇರಿದಂತೆ ಹಲವು ವಿಷಯಗಳ ಕುರಿತು ತಮ್ಮ ಅಭಿಪ್ರಾಯ ಹಂಚಿಕೊಂಡರು.
ಪಥಸಂಚಲನಕ್ಕೆ ಅನುಮತಿ ಪಡೆಯುತ್ತೇವೆ
ಈ ಹಿಂದೆ ಪಥಸಂಚಲನದ ಸಂದರ್ಭದಲ್ಲಿ ಪೊಲೀಸರಿಗೆ ಮುಂಚಿತವಾಗಿ ಮಾಹಿತಿ ನೀಡಲಾಗುತ್ತಿತ್ತು. ಎಷ್ಟು ಜನ ಭಾಗವಹಿಸುತ್ತಾರೆ ಎಂಬ ಮಾಹಿತಿಯನ್ನು ನೀಡುವ ಮೂಲಕ ಸಂಚಾರ ಹಾಗೂ ಕಾನೂನು ಸುವ್ಯವಸ್ಥೆ ನಿರ್ವಹಣೆಗೆ ಪೊಲೀಸರಿಗೆ ಅನುಕೂಲ ಕಲ್ಪಿಸಲಾಗುತ್ತಿತ್ತು. ಆದರೆ ಈಗ ಅನುಮತಿ ಪಡೆಯುವುದು ಕಡ್ಡಾಯವಾಗುತ್ತಿರುವ ಹಿನ್ನೆಲೆಯಲ್ಲಿ ಸರ್ಕಾರದ ನಿಯಮಗಳ ಪ್ರಕಾರ ಅರ್ಜಿ ಸಲ್ಲಿಸುತ್ತೇವೆ ಎಂದು ಮಧುಕರ್ ತಿಳಿಸಿದರು.
ಬೆಂಗಳೂರಿನಲ್ಲಿ ನಡೆದ ಸಂಘದ ಕಾರ್ಯಕ್ರಮವೊಂದಕ್ಕೆ ಭಾಗವಹಿಸುವವರ ಆಧಾರ್ ಕಾರ್ಡ್ ಸೇರಿದಂತೆ ವಿವರಗಳನ್ನು ಕೇಳಲಾಗಿತ್ತು. ಅಲ್ಲದೆ, ಪೊಲೀಸ್ ಭದ್ರತೆಗಾಗಿ ಎರಡು ಲಕ್ಷ ರೂಪಾಯಿ ಪಾವತಿಸುವಂತೆ ತಿಳಿಸಲಾಗಿತ್ತು. ಸಂಘವು ಆ ಮೊತ್ತವನ್ನು ಪಾವತಿಸಿ ಕಾರ್ಯಕ್ರಮ ನಡೆಸಿದೆ. ಆದರೆ ಗ್ರಾಮೀಣ ಪ್ರದೇಶಗಳಲ್ಲಿ 100ರಿಂದ 200 ಜನರು ಪಥಸಂಚಲನ ನಡೆಸುವುದಕ್ಕೂ ಇದೇ ರೀತಿಯ ಶುಲ್ಕ ಅಥವಾ ಅನುಮತಿ ವ್ಯವಸ್ಥೆ ಅಗತ್ಯವೇ ಎಂಬುದನ್ನು ಸರ್ಕಾರ ಪರಿಶೀಲಿಸಬೇಕು ಎಂದು ಅಭಿಪ್ರಾಯಪಟ್ಟರು.
ಸಾರ್ವಜನಿಕ ರಸ್ತೆಗಳಲ್ಲಿ ಒಟ್ಟಾಗಿ ನಡೆಯುವುದು ನಾಗರಿಕರ ಹಕ್ಕಿನ ಭಾಗವಾಗಿದೆ. ಪಥಸಂಚಲನದಿಂದ ಕಾನೂನು ಸುವ್ಯವಸ್ಥೆಗೆ ಸಮಸ್ಯೆಯಾದರೆ ಕ್ರಮ ಕೈಗೊಳ್ಳಲಿ. ಅಗತ್ಯವಿದ್ದರೆ ನಿಯಮಗಳನ್ನು ಪಾಲಿಸುವುದಾಗಿ ಮುಚ್ಚಳಿಕೆ ನೀಡಲು ಸಿದ್ಧರಿದ್ದೇವೆ. ಆದರೆ ಪಥಸಂಚಲನ ನಡೆಸುವ ಪ್ರತಿ ಸಂದರ್ಭದಲ್ಲೂ ಶುಲ್ಕ ಮತ್ತು ಅನುಮತಿಯ ವಿಚಾರವನ್ನು ಮರುಪರಿಶೀಲಿಸಬೇಕು ಎಂದರು.
ತಮಿಳುನಾಡಿನ ಪರಿಸ್ಥಿತಿಯ ಉಲ್ಲೇಖ
ತಮಿಳುನಾಡಿನಲ್ಲಿ ಕಳೆದ ಶತಾಬ್ದಿ ವರ್ಷದಲ್ಲಿ ಸಂಘದ ಪಥಸಂಚಲನಗಳಿಗೆ ಅವಕಾಶ ನೀಡದಿರುವ ಕುರಿತು ಮಾತನಾಡಿದ ಮಧುಕರ್, ಹೈಕೋರ್ಟ್‌ನ ಆದೇಶಗಳಿದ್ದರೂ ಅನುಮತಿ ನಿರಾಕರಿಸಲಾಗುತ್ತಿದೆ ಎಂದು ಆರೋಪಿಸಿದರು. ಕರ್ನಾಟಕದಲ್ಲಿ ಈ ಹಿಂದೆ ಇಂತಹ ಅನುಮತಿ ಪಡೆಯುವ ಅಗತ್ಯ ಹೆಚ್ಚಾಗಿ ಎದುರಾಗಿರಲಿಲ್ಲ. ಈಗ ಸರ್ಕಾರದ ನಿಯಮಗಳ ಹಿನ್ನೆಲೆಯಲ್ಲಿ ಅನುಮತಿ ಪಡೆದು ಮುಂದುವರಿಯುತ್ತೇವೆ ಎಂದು ಹೇಳಿದರು.
ಸಂಘದ ಪಂಚ ಪರಿವರ್ತನೆಯ ಐದನೇ ಅಂಶವಾದ ನಾಗರಿಕ ಕರ್ತವ್ಯ ಹಾಗೂ ಶಿಷ್ಟಾಚಾರದ ಭಾಗವಾಗಿ ಕಾನೂನು ಮತ್ತು ನಿಯಮಗಳನ್ನು ಪಾಲಿಸುವುದಕ್ಕೆ ಆದ್ಯತೆ ನೀಡಲಾಗುತ್ತಿದೆ. ಹೀಗಾಗಿ ಸರ್ಕಾರದೊಂದಿಗೆ ಅನಗತ್ಯ ಸಂಘರ್ಷಕ್ಕೆ ಇಳಿಯುವ ಉದ್ದೇಶವಿಲ್ಲ. ಆದರೆ ಸರ್ಕಾರ ಅಧಿಕಾರ ದುರುಪಯೋಗ ಮಾಡುತ್ತಿದೆ ಎಂಬ ಭಾವನೆ ಸಂಘಕ್ಕಿದೆ ಎಂದು ಮಧುಕರ್ ಹೇಳಿದರು.
ಆರ್‌ಎಸ್‌ಎಸ್‌ನಿಂದ ಭಾರತೀಯ ರಾಷ್ಟ್ರೀಯತೆಯ ಕಥನ
ಭಾರತೀಯ ರಾಷ್ಟ್ರೀಯತೆಯ ಕುರಿತು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಮಧುಕರ್, ದೇಶದ ಸಂಸ್ಕೃತಿ, ಪರಂಪರೆ ಮತ್ತು ಚಿಂತನೆಯ ಆಧಾರದಲ್ಲಿ ಸತ್ಯದ ಕಥನವನ್ನು ಸಮಾಜದ ಮುಂದಿಡುವ ಅಗತ್ಯವಿದೆ ಎಂದರು.
ಇದುವರೆಗೆ ಈ ರೀತಿಯ ಕಥನವನ್ನು ಸಮಾಜದ ಮುಂದೆ ಸಮರ್ಪಕವಾಗಿ ಇಡಲು ಸಾಧ್ಯವಾಗಿರಲಿಲ್ಲ. ಈಗ ಸಂಘವು ಭಾರತೀಯ ರಾಷ್ಟ್ರೀಯತೆಯ ದೃಷ್ಟಿಕೋನದಿಂದ ಸಮಾಜದ ಮುಂದೆ ನೈಜ ಕಥನವನ್ನು ರೂಪಿಸುವ ಬಗ್ಗೆಯೂ ಯೋಚಿಸುತ್ತಿದೆ. ಸಂಘದ ಶತಾಬ್ದಿ ಅಂಗವಾಗಿ ಹಮ್ಮಿಕೊಳ್ಳಲಾಗಿರುವ ಕಾರ್ಯಕ್ರಮಗಳ ಉದ್ದೇಶಗಳಲ್ಲಿ ಇದೂ ಒಂದು ಎಂದು ವಿವರಿಸಿದರು.
ಜಾತೀಯತೆ ನಿವಾರಣೆಗೆ ಸಂಘದ ಪ್ರಯತ್ನ
ಜಾತೀಯತೆ ಮತ್ತು ಸಾಮಾಜಿಕ ತಾರತಮ್ಯದ ಕುರಿತು ಮಾತನಾಡಿದ ಮಧುಕರ್, ಈ ಸಮಸ್ಯೆಗಳನ್ನು ನಿವಾರಿಸಲು ಸಂಘದಲ್ಲಿ ಪ್ರತ್ಯೇಕ ವ್ಯವಸ್ಥೆ ರೂಪಿಸಲಾಗಿದೆ ಎಂದರು. ದೇವಸ್ಥಾನ ಪ್ರವೇಶ, ಒಟ್ಟಿಗೆ ಊಟ ಮಾಡುವುದು ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಜಾತಿ ಆಧಾರಿತ ತಾರತಮ್ಯವನ್ನು ದೂರ ಮಾಡುವ ಪ್ರಯತ್ನಗಳು ನಡೆಯುತ್ತಿವೆ ಎಂದು ತಿಳಿಸಿದರು.
ಯಾವುದೇ ವ್ಯಕ್ತಿಯನ್ನು ಜಾತಿಯ ಆಧಾರದಲ್ಲಿ ತಡೆಯಬಾರದು ಎಂಬುದು ಸಂಘದ ನಿಲುವು. ಸಮಾಜದಲ್ಲಿ ಕೆಲವು ಸಂಪ್ರದಾಯಗಳು ಮತ್ತು ಆಚರಣೆಗಳಲ್ಲಿ ಮೌಢ್ಯವಿದ್ದರೆ ಅವುಗಳನ್ನು ಕ್ರಾಂತಿಯ ಮೂಲಕ ಬದಲಾಯಿಸುವುದಕ್ಕಿಂತ ಜನರಲ್ಲಿ ಜಾಗೃತಿ ಮೂಡಿಸಿ, ಹಂತ ಹಂತವಾಗಿ ಬದಲಾವಣೆ ತರಬೇಕು ಎಂಬುದು ಸಂಘದ ನಂಬಿಕೆ ಎಂದು ಹೇಳಿದರು.
ಸಮಾಜದ ಒಂದು ದೊಡ್ಡ ಭಾಗದ ಆಚರಣೆಗಳನ್ನು ತಕ್ಷಣವೇ ವಿರೋಧಿಸಿ, ಅವುಗಳನ್ನು ಅನುಸರಿಸುವವರನ್ನು ಹಿಂದೂಗಳಲ್ಲ ಎಂದು ಹೇಳುವ ನಿಲುವು ಸಂಘದ್ದಲ್ಲ. ಬದಲಾಗಿ, ಸಮಯ ತೆಗೆದುಕೊಂಡು ಸಮಾಜದೊಳಗಿನಿಂದಲೇ ಬದಲಾವಣೆ ತರಲು ಪ್ರಯತ್ನಿಸಲಾಗುತ್ತದೆ ಎಂದರು.
ಆರ್‌ಎಸ್‌ಎಸ್ ಮತ್ತು ಬಿಜೆಪಿಯ ನಡುವಿನ ಸಂಬಂಧ
ಆರ್‌ಎಸ್‌ಎಸ್ ಮತ್ತು ಬಿಜೆಪಿಯ ನಡುವಿನ ಸಂಬಂಧದ ಕುರಿತು ಪ್ರತಿಕ್ರಿಯಿಸಿದ ಮಧುಕರ್, ಎರಡೂ ಒಂದೇ ವೈಚಾರಿಕ ಪರಿವಾರಕ್ಕೆ ಸೇರಿದವು ಎಂದು ಹೇಳಿದರು.
ಭಾರತದ ಮೂಲ ಸಂಸ್ಕೃತಿ ಹಿಂದೂ ಸಂಸ್ಕೃತಿಯಾಗಿದ್ದು, ಅದರ ಪುನರುತ್ಥಾನ, ಹಿಂದೂಗಳ ಸಂಘಟನೆ ಹಾಗೂ ದೇಶವನ್ನು ಪರಮ ವೈಭವದ ಸ್ಥಿತಿಗೆ ಕೊಂಡೊಯ್ಯುವುದು ಸಂಘದ ವಿಚಾರಧಾರೆಯಾಗಿದೆ ಎಂದು ವಿವರಿಸಿದರು.
ರಾಜಕೀಯ, ಶಿಕ್ಷಣ, ಉದ್ಯೋಗ, ಕಾನೂನು, ಕೃಷಿ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಈ ವಿಚಾರಧಾರೆಯ ಆಧಾರದಲ್ಲಿ ಕೆಲಸ ಮಾಡಬೇಕು ಎಂಬುದು ಸಂಘದ ಆಶಯ. ಬಿಜೆಪಿ ಕೂಡ ಸಾಂಸ್ಕೃತಿಕ ರಾಷ್ಟ್ರೀಯತೆಯ ಆಧಾರದಲ್ಲಿ ಕಾರ್ಯನಿರ್ವಹಿಸುತ್ತಿದೆ ಎಂದು ಮಧುಕರ್ ಹೇಳಿದರು.
We do not want a confrontation with the government regarding permission for the march; we will proceed by adhering to the rules – Madhukar
