ಟೋಯಿಂಗ್ ವಾಹನ ಮಾರ್ಪಾಡಿನಲ್ಲಿ ಸೇವಾ ಲೋಪ: ₹2.45 ಲಕ್ಷ ಮರುಪಾವತಿಗೆ ಆದೇಶ, ₹50 ಸಾವಿರ ಪರಿಹಾರ-Service lapse in towing vehicle modification: Order to refund ₹2.45 lakh, compensation ₹50 thousand

SUDDILIVE || SHIVAMOGGA

ಟೋಯಿಂಗ್ ವಾಹನ ಮಾರ್ಪಾಡಿನಲ್ಲಿ ಸೇವಾ ಲೋಪ: ₹2.45 ಲಕ್ಷ ಮರುಪಾವತಿಗೆ ಆದೇಶ, ₹50 ಸಾವಿರ ಪರಿಹಾರ-Service lapse in towing vehicle modification: Order to refund ₹2.45 lakh, compensation ₹50 thousand    

ಶಿವಮೊಗ್ಗ: ಟೋಯಿಂಗ್ ವಾಹನವಾಗಿ ಮಾರ್ಪಾಡು ಮಾಡಿಕೊಡುವುದಾಗಿ ಹಣ ಪಡೆದು, ಸರಿಯಾಗಿ ಕೆಲಸ ನಿರ್ವಹಿಸದೆ ಸೇವಾ ನ್ಯೂನತೆ ಎಸಗಿದ ಪ್ರಕರಣದಲ್ಲಿ ತುಮಕೂರು ಜಿಲ್ಲೆಯ ಟೋಯಿಂಗ್ ಸರ್ವೀಸ್ ಮಾಲೀಕರಿಗೆ ದಂಡ ವಿಧಿಸಿ, ಹಣ ಮರುಪಾವತಿ ಮಾಡುವಂತೆ ಶಿವಮೊಗ್ಗ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗ ಆದೇಶಿಸಿದೆ.

ಶಿವಮೊಗ್ಗದ ವಿದ್ಯಾನಗರ ನಿವಾಸಿ ಸಿ. ರಘು ಅವರು ಸಲ್ಲಿಸಿದ್ದ ದೂರಿನ ವಿಚಾರಣೆ ನಡೆಸಿದ ಜಿಲ್ಲಾ ಗ್ರಾಹಕ ಆಯೋಗದ ಅಧ್ಯಕ್ಷ ಟಿ. ಶಿವಣ್ಣ ಹಾಗೂ ಸದಸ್ಯ ಬಿ.ಡಿ. ಯೋಗಾನಂದ ಭಾಂಡ್ರ ಅವರನ್ನು ಒಳಗೊಂಡ ಪೀಠ ಈ ತೀರ್ಪು ನೀಡಿದೆ.

₹2.45 ಲಕ್ಷಕ್ಕೆ ಟೋಯಿಂಗ್ ವಾಹನವಾಗಿ ಮಾರ್ಪಾಡು

ದೂರುದಾರ ಸಿ. ರಘು ಅವರು ತಮ್ಮ ವಾಹನವನ್ನು ಟೋಯಿಂಗ್ ವಾಹನವಾಗಿ ಮಾರ್ಪಾಡು ಮಾಡಿಸಿಕೊಳ್ಳಲು ತುಮಕೂರು ಜಿಲ್ಲೆಯ ಕುಣಿಗಲ್ ತಾಲೂಕಿನ ವಾಯುಪುತ್ರ ಟೋಯಿಂಗ್ ಸರ್ವೀಸ್‌ನ ಪ್ರದೀಪ್ ಕೆ.ಆರ್. ಅವರೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದರು. ಇದಕ್ಕಾಗಿ ₹2,45,000 ಪಾವತಿಸಲು ಒಪ್ಪಿ, 2024ರ ಡಿಸೆಂಬರ್‌ನಲ್ಲಿ ವಾಹನವನ್ನು ಮಾರ್ಪಾಡು ಮಾಡಿಕೊಡಲು ನೀಡಿದ್ದರು.

2025ರ ಮಾರ್ಚ್‌ನಲ್ಲಿ ಎದುರುದಾರರು ಮಾರ್ಪಾಡು ಮಾಡಿದ ವಾಹನವನ್ನು ಹಿಂದಿರುಗಿಸಿದ್ದರು. ಆದರೆ, ವಾಹನವನ್ನು ಹೆದ್ದಾರಿಯಲ್ಲಿ ಚಲಾಯಿಸಿಕೊಂಡು ಹೋಗುತ್ತಿದ್ದ ಸಂದರ್ಭದಲ್ಲಿ ಹೈಡ್ರಾಲಿಕ್ ಯಂತ್ರ ದಿಢೀರ್ ಸ್ಥಗಿತಗೊಂಡಿತ್ತು. ಇದರಿಂದ ವಾಹನವನ್ನು ಮುಂದಕ್ಕೆ ಸಾಗಿಸಲು ತೀವ್ರ ತೊಂದರೆ ಎದುರಾಗಿತ್ತು.

ಹಳೆಯ ಬಿಡಿಭಾಗಗಳ ಬಳಕೆ ಆರೋಪ

ವಾಹನವನ್ನು ಪರಿಶೀಲಿಸಿದಾಗ ಮಾರ್ಪಾಡು ಮಾಡುವ ಸಂದರ್ಭದಲ್ಲಿ ಹೊಸ ಬಿಡಿಭಾಗಗಳ ಬದಲಿಗೆ ಹಳೆಯ ಬಿಡಿಭಾಗಗಳನ್ನು ಅಳವಡಿಸಿರುವುದು ಕಂಡುಬಂದಿತ್ತು ಎಂದು ದೂರುದಾರರು ಆರೋಪಿಸಿದ್ದರು. ಹಳೆಯ ಬಿಡಿಭಾಗಗಳನ್ನು ತೆಗೆದು ಹೊಸ ಬಿಡಿಭಾಗಗಳನ್ನು ಅಳವಡಿಸಿ ದುರಸ್ತಿಪಡಿಸಿಕೊಡುವಂತೆ ಹಾಗೂ ವಾಹನ ಮಾರ್ಪಾಡಿಗೆ ಸಂಬಂಧಿಸಿದ ಅಗತ್ಯ ದಾಖಲೆಗಳನ್ನು ನೀಡುವಂತೆ ಎದುರುದಾರರನ್ನು ಕೇಳಿಕೊಂಡಿದ್ದರು.

ಆದರೆ, ಎದುರುದಾರರಿಂದ ಯಾವುದೇ ಸೂಕ್ತ ಸ್ಪಂದನೆ ದೊರೆಯದ ಹಿನ್ನೆಲೆಯಲ್ಲಿ ದೂರುದಾರರು ಶಿವಮೊಗ್ಗದಲ್ಲಿಯೇ ತಮ್ಮ ಸ್ವಂತ ಖರ್ಚಿನಲ್ಲಿ ವಾಹನವನ್ನು ದುರಸ್ತಿಪಡಿಸಿಕೊಂಡಿದ್ದರು. ಇದಕ್ಕಾಗಿ ಸುಮಾರು ₹3 ಲಕ್ಷ ವೆಚ್ಚವಾಗಿತ್ತು.

ಈ ಸಂಬಂಧ 2025ರ ಸೆಪ್ಟೆಂಬರ್ 27ರಂದು ಎದುರುದಾರರಿಗೆ ಕಾನೂನು ನೋಟಿಸ್ ನೀಡಿದರೂ ಯಾವುದೇ ಪ್ರತಿಕ್ರಿಯೆ ಬಾರದ ಕಾರಣ ಸಿ. ರಘು ಅವರು ಶಿವಮೊಗ್ಗ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗದ ಮೊರೆ ಹೋಗಿದ್ದರು.

ಎದುರುದಾರರಿಗೆ ಏಕಪಕ್ಷೀಯ ತೀರ್ಪು

ಪ್ರಕರಣದ ವಿಚಾರಣೆ ವೇಳೆ ದೂರುದಾರರು ಸಲ್ಲಿಸಿದ್ದ ದಾಖಲೆಗಳನ್ನು ಪರಿಶೀಲಿಸಿದ ಆಯೋಗ, ಎದುರುದಾರರು ವಿಚಾರಣೆಗೆ ಹಾಜರಾಗದ ಹಿನ್ನೆಲೆಯಲ್ಲಿ ಅವರನ್ನು ಏಕಪಕ್ಷೀಯವಾಗಿ ಪರಿಗಣಿಸಿ ತೀರ್ಪು ಪ್ರಕಟಿಸಿದೆ.

ಆಯೋಗದ ಆದೇಶವೇನು?

• ದೂರುದಾರರಿಗೆ ₹2,45,000 ಹಣವನ್ನು 2025ರ ಸೆಪ್ಟೆಂಬರ್ 27ರಿಂದ ವಾರ್ಷಿಕ ಶೇ. 8ರ ಬಡ್ಡಿಯೊಂದಿಗೆ ಆದೇಶದ 45 ದಿನಗಳ ಒಳಗೆ ಮರುಪಾವತಿಸಬೇಕು.
• ನಿಗದಿತ ಅವಧಿಯಲ್ಲಿ ಹಣ ಪಾವತಿಸದಿದ್ದರೆ ವಾರ್ಷಿಕ ಶೇ. 10ರ ಬಡ್ಡಿ ಪಾವತಿಸಬೇಕು.
• ವಾಹನಕ್ಕೆ ಅಳವಡಿಸಿರುವ ಟೋಯಿಂಗ್ ಯಂತ್ರವನ್ನು ಎದುರುದಾರರು ತಮ್ಮ ಸ್ವಂತ ಖರ್ಚಿನಲ್ಲಿ ವಾಪಸ್ ಪಡೆದುಕೊಳ್ಳಬೇಕು.
• ದೂರುದಾರರಿಗೆ ಉಂಟಾದ ತೊಂದರೆ ಹಾಗೂ ನಷ್ಟಕ್ಕೆ ಪರಿಹಾರವಾಗಿ ₹50,000 ಪಾವತಿಸಬೇಕು.
• ಪ್ರಕರಣದ ಖರ್ಚು ವೆಚ್ಚಕ್ಕಾಗಿ ₹5,000 ನೀಡಬೇಕು. ಈ ಮೊತ್ತಗಳಿಗೂ ವಾರ್ಷಿಕ ಶೇ. 8ರ ಬಡ್ಡಿ ಪಾವತಿಸುವಂತೆ ಆಯೋಗ ಆದೇಶಿಸಿದೆ.

ಗ್ರಾಹಕರಿಂದ ಹಣ ಪಡೆದು ಸೇವೆ ಒದಗಿಸುವ ಸಂದರ್ಭದಲ್ಲಿ ಗುಣಮಟ್ಟ ಕಾಯ್ದುಕೊಳ್ಳದಿರುವುದು ಹಾಗೂ ದೂರುಗಳಿಗೆ ಸ್ಪಂದಿಸದಿರುವುದು ಸೇವಾ ನ್ಯೂನತೆಯಾಗುತ್ತದೆ ಎಂಬುದನ್ನು ಈ ಪ್ರಕರಣದ ತೀರ್ಪು ಮತ್ತೊಮ್ಮೆ ಗಮನಕ್ಕೆ ತಂದಿದೆ.

Service lapse in towing vehicle modification: Order to refund ₹2.45 lakh, compensation ₹50 thousand