ಸೊಸೆಯ ಕಿರುಕುಳದಿಂದ ಮನನೊಂದು ಮಾವ ಆತ್ಮಹತ್ಯೆ, ಐವರ ವಿರುದ್ಧ ಪ್ರಕರಣ ದಾಖಲು-Father-in-law commits suicide due to harassment by daughter-in-law? Case registered against five

SUDDILIVE || SHIVAMOGGA

ಸೊಸೆಯ ಕಿರುಕುಳದಿಂದ ಮನನೊಂದು ಮಾವ ಆತ್ಮಹತ್ಯೆ, ಐವರ ವಿರುದ್ಧ ಪ್ರಕರಣ ದಾಖಲು-Father-in-law commits suicide due to harassment by daughter-in-law, Case registered against five 

ಶಿವಮೊಗ್ಗ ಜಿಲ್ಲೆಯ ಶಿಕಾರಿಪುರ ತಾಲ್ಲೂಕಿನ ನೆರಲಗಿ ಗ್ರಾಮದಲ್ಲಿ 55 ವರ್ಷದ ವ್ಯಕ್ತಿಯೊಬ್ಬರು ಮರಕ್ಕೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ನಡೆದಿದೆ. ತಮ್ಮ ಪತಿಯ ಸಾವಿಗೆ ಸೊಸೆ ಸೇರಿದಂತೆ ಐವರು ಕಾರಣರಾಗಿದ್ದಾರೆ ಎಂದು ಮೃತರ ಪತ್ನಿ ಶಿರಾಳಕೊಪ್ಪ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಐವರ ವಿರುದ್ಧ ಪ್ರಕರಣ ದಾಖಲಾಗಿದೆ.

ಮೃತರನ್ನು ನೆರಲಗಿ ಗ್ರಾಮದ ಶಿವಮೂರ್ತಿ (55) ಎಂದು ಗುರುತಿಸಲಾಗಿದೆ.

ಪ್ರೀತಿಸಿ ಮದುವೆಯಾದ ಮಗನ ಸಂಸಾರದಲ್ಲಿ ಕಲಹ

ಮೃತ ಶಿವಮೂರ್ತಿ ಅವರ ಮಗ ಸುಮಾರು 7-8 ವರ್ಷಗಳ ಹಿಂದೆ ಉಡುಗಣಿ ಗ್ರಾಮದ ನಾಗಪ್ಪ ಅವರ ಮಗಳು ಸೃಷ್ಟಿ ಎಂಬುವರನ್ನು ಪ್ರೀತಿಸಿ ವಿವಾಹವಾಗಿದ್ದರು. ಆರಂಭದಲ್ಲಿ ಎರಡು-ಮೂರು ವರ್ಷಗಳ ಕಾಲ ದಾಂಪತ್ಯ ಜೀವನ ಚೆನ್ನಾಗಿತ್ತು. ಬಳಿಕ ಕುಟುಂಬದಲ್ಲಿ ಸಣ್ಣಪುಟ್ಟ ವಿಚಾರಗಳಿಗೆ ಗಲಾಟೆ ಆರಂಭವಾಗಿತ್ತು ಎಂದು ಮೃತರ ಪತ್ನಿ ರೇಣುಕಮ್ಮ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ಕಳೆದ ಎರಡು ವರ್ಷಗಳಿಂದ ಸೃಷ್ಟಿ ಸರಿಯಾಗಿ ಸಂಸಾರ ನಡೆಸುತ್ತಿರಲಿಲ್ಲ. ಅಲ್ಲದೆ, ತನ್ನ ಪತಿ, ಅತ್ತೆ, ಮಾವ ಹಾಗೂ ಮೈದುನನ ವಿರುದ್ಧ ಕೌಟುಂಬಿಕ ಹಿಂಸೆಯ ಪ್ರಕರಣ ದಾಖಲಿಸಿದ್ದರು. ಇದರಿಂದ ಕುಟುಂಬದಲ್ಲಿ ಮಾನಸಿಕ ನೆಮ್ಮದಿ ಇಲ್ಲದಂತಾಗಿತ್ತು ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

'ನೀನು ಸತ್ತರೆ ನಾವು ನೆಮ್ಮದಿಯಾಗಿರುತ್ತೇವೆ' ಎಂದು ನಿಂದನೆಯ ಆರೋಪ

ಐದಾರು ದಿನಗಳ ಹಿಂದೆ ಮಗನನ್ನು ಮನೆಗೆ ಕರೆಸಿಕೊಂಡಿದ್ದ ಸಂದರ್ಭದಲ್ಲಿ ಮತ್ತೆ ಗಲಾಟೆ ನಡೆದಿತ್ತು. ಈ ವೇಳೆ ಸೊಸೆ ಸೃಷ್ಟಿ ತನ್ನ ಪತಿಗೆ, 'ನಿನ್ನಿಂದಲೇ ನನ್ನ ಸಂಸಾರ ಹಾಳಾಗಿದೆ. ನೀನು ಸತ್ತರೆ ನಾವು ನೆಮ್ಮದಿಯಾಗಿರುತ್ತೇವೆ' ಎಂದು ಮಾವ ಶಿವಮೂರ್ತಿ ಅವರನ್ನು ನಿಂದಿಸಿದ್ದಳು ಎಂದು ಆರೋಪಿಸಲಾಗಿದೆ.

ಈ ವಿಚಾರದಿಂದ ಶಿವಮೂರ್ತಿ ತೀವ್ರ ಮಾನಸಿಕ ನೋವು ಅನುಭವಿಸುತ್ತಿದ್ದರು. ಕುಟುಂಬದವರು ಹಲವು ಬಾರಿ ರಾಜಿ ಪಂಚಾಯಿತಿ ನಡೆಸಿದರೂ ಸಮಸ್ಯೆ ಬಗೆಹರಿದಿರಲಿಲ್ಲ ಎಂದು ರೇಣುಕಮ್ಮ ದೂರಿನಲ್ಲಿ ತಿಳಿಸಿದ್ದಾರೆ.

ಮನೆಗೆ ಬಂದು ಗಲಾಟೆ, ಹಲ್ಲೆ ಮಾಡುತ್ತಿದ್ದ ಆರೋಪ

ಸೊಸೆ ಸೃಷ್ಟಿಯ ಕುಟುಂಬದವರಾದ ಆಕೆಯ ತಂದೆ ನಾಗಪ್ಪ, ಚಿಕ್ಕಮ್ಮ ರೇಣುಕಮ್ಮ, ಚಿಕ್ಕಮ್ಮನ ಮಗ ವಿನಾಯಕ ಹಾಗೂ ಸಂಬಂಧಿ ಮನೋಜ್ ಅವರು ಹಲವು ಬಾರಿ ಮನೆಗೆ ಬಂದು ಗಲಾಟೆ ಮಾಡುತ್ತಿದ್ದರು. ಕೆಟ್ಟ ಪದಗಳಿಂದ ನಿಂದಿಸಿ, ದೈಹಿಕ ಹಲ್ಲೆ ನಡೆಸಿ ಕುಟುಂಬದವರನ್ನು ಹೆದರಿಸುತ್ತಿದ್ದರು ಎಂಬ ಆರೋಪವೂ ದೂರಿನಲ್ಲಿದೆ.

ಈ ಸಂಬಂಧ ಹಲವು ಬಾರಿ ಶಿರಾಳಕೊಪ್ಪ ಪೊಲೀಸ್ ಠಾಣೆಗೆ ದೂರು ನೀಡಲಾಗಿತ್ತು. ಬಳಿಕ ರಾಜಿ ಮಾಡಿಕೊಳ್ಳಲಾಗುತ್ತಿತ್ತು. ಆದರೂ ಮತ್ತೆ ಮತ್ತೆ ಗಲಾಟೆ ನಡೆಯುತ್ತಿತ್ತು. ಇದರಿಂದ ಪತಿ ಶಿವಮೂರ್ತಿ ಊರಿನ ಜನರ ಮುಂದೆ ಮಾನ-ಮರ್ಯಾದೆ ಕಳೆದುಕೊಂಡ ಭಾವನೆಯಿಂದ ತೀವ್ರವಾಗಿ ನೊಂದಿದ್ದರು ಎಂದು ಪತ್ನಿ ದೂರಿನಲ್ಲಿ ವಿವರಿಸಿದ್ದಾರೆ.

ತೋಟದಲ್ಲಿನ ಮರಕ್ಕೆ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆ

ನವೆಂಬರ್ 12ರಂದು ಮಧ್ಯಾಹ್ನ ಸುಮಾರು 2.30ರ ವೇಳೆಗೆ ಶಿವಮೂರ್ತಿ ಅವರು ಕುರಿ ಮೇಯಿಸಲು ಹೋಗಿದ್ದರು. ಸಂಜೆ 3.30ರ ಸುಮಾರಿಗೆ ಗ್ರಾಮದ ಗಂಗಪ್ಪ ಎಂಬುವವರು ಕುರಿ ಮೇಯಿಸುತ್ತಿದ್ದಾಗ ಅರುಣಗೌಡ ಅವರ ಜಮೀನಿನ ಮೂಲೆಯಲ್ಲಿದ್ದ ಮರಕ್ಕೆ ಶಿವಮೂರ್ತಿ ನೇಣು ಬಿಗಿದುಕೊಂಡಿರುವುದನ್ನು ಗಮನಿಸಿದ್ದಾರೆ.

ತಕ್ಷಣ ಕುಟುಂಬದವರಿಗೆ ವಿಷಯ ತಿಳಿಸಿದ್ದು, ಪತ್ನಿ ರೇಣುಕಮ್ಮ ಹಾಗೂ ಗ್ರಾಮಸ್ಥರು ಸ್ಥಳಕ್ಕೆ ತೆರಳಿ ಶಿವಮೂರ್ತಿ ಅವರನ್ನು ಕೆಳಗಿಳಿಸಿದ್ದಾರೆ. ಆಗ ಅವರು ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದರು. ಕೂಡಲೇ ಮೈದುನನ ಆಟೊದಲ್ಲಿ ಶಿರಾಳಕೊಪ್ಪ ಸರ್ಕಾರಿ ಆಸ್ಪತ್ರೆಗೆ ಸಂಜೆ ಸುಮಾರು 4.40ಕ್ಕೆ ಕರೆದೊಯ್ಯಲಾಗಿತ್ತು. ಪರೀಕ್ಷಿಸಿದ ವೈದ್ಯರು ಅವರು ಮೃತಪಟ್ಟಿರುವುದಾಗಿ ತಿಳಿಸಿದ್ದಾರೆ.

ಜೇಬಿನಲ್ಲಿ ಚೀಟಿ ಪತ್ತೆ

ಶಿವಮೂರ್ತಿ ಅವರ ಜೇಬಿನಲ್ಲಿ ಮೊಬೈಲ್, ಎಲೆ-ಅಡಿಕೆ ಚೀಲದ ಜೊತೆಗೆ ಒಂದು ಚೀಟಿ ಪತ್ತೆಯಾಗಿತ್ತು. ಆ ಚೀಟಿಯಲ್ಲಿ ತಮ್ಮ ಸಾವಿಗೆ ಸೊಸೆ ಕಾರಣವಾಗಿದ್ದು, ತಮ್ಮ ಆಸ್ತಿ ಇಬ್ಬರು ಹೆಣ್ಣುಮಕ್ಕಳಿಗೆ ಸೇರಬೇಕು ಎಂದು ಬರೆದಿರುವುದಾಗಿ ಪತ್ನಿ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ತಮ್ಮ ಪತಿಯ ಸಾವಿಗೆ ಸೊಸೆ ಸೃಷ್ಟಿ ಹಾಗೂ ಆಕೆಗೆ ಸಹಕರಿಸಿದ್ದಾರೆ ಎನ್ನಲಾದ ನಾಗಪ್ಪ, ಚಿಕ್ಕಮ್ಮ ರೇಣುಕಮ್ಮ, ವಿನಾಯಕ ಮತ್ತು ಮನೋಜ್ ಕಾರಣರಾಗಿದ್ದು, ಅವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ರೇಣುಕಮ್ಮ ಒತ್ತಾಯಿಸಿದ್ದಾರೆ.

ಐವರ ವಿರುದ್ಧ ಪ್ರಕರಣ ದಾಖಲು

ಮೃತರ ಪತ್ನಿ ರೇಣುಕಮ್ಮ (46) ಅವರು ನವೆಂಬರ್ 12ರಂದು ರಾತ್ರಿ 8.30ರ ಸುಮಾರಿಗೆ ಶಿರಾಳಕೊಪ್ಪ ಪೊಲೀಸ್ ಠಾಣೆಗೆ ಹಾಜರಾಗಿ ದೂರು ನೀಡಿದ್ದಾರೆ. ದೂರಿನ ಆಧಾರದ ಮೇಲೆ ಸೃಷ್ಟಿ, ನಾಗಪ್ಪ, ರೇಣುಕಮ್ಮ, ವಿನಾಯಕ ಹಾಗೂ ಮನೋಜ್ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

Father-in-law commits suicide due to harassment by daughter-in-law? Case registered against five