ಜೊಮ್ಯಾಟೋ, ಹೋಟೆಲ್ ಗೆ ಬಿತ್ತು ದಂಡ ಯಾಕೆಗೊತ್ತ?Why did Zomato fine the hotel?

 SUDDILIVE || SHIVAMOGGA

ಜೊಮ್ಯಾಟೋ, ಹೋಟೆಲ್ ಗೆ ಬಿತ್ತು ದಂಡ ಯಾಕೆಗೊತ್ತ?Why did Zomato fine the hotel?    

ಶಿವಮೊಗ್ಗ: ಸಸ್ಯಾಹಾರಿ (ವೆಜ್) ಬರ್ಗರ್ ಆರ್ಡರ್ ಮಾಡಿದ ಗ್ರಾಹಕರಿಗೆ ತಪ್ಪಾಗಿ ಮಾಂಸಾಹಾರಿ (ನಾನ್‌ವೆಜ್) ಬರ್ಗರ್ ವಿತರಿಸಿದ ಪ್ರಕರಣದಲ್ಲಿ, ಸೇವಾ ನ್ಯೂನತೆ ಎಸಗಿರುವುದಾಗಿ ಪರಿಗಣಿಸಿದ ಶಿವಮೊಗ್ಗ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗವು ಆನ್‌ಲೈನ್ ಆಹಾರ ವಿತರಣಾ ಸಂಸ್ಥೆ ಜೊಮ್ಯಾಟೊ ಹಾಗೂ ಸಂಬಂಧಿತ ಹೋಟೆಲ್ ಮಾಲೀಕರಿಗೆ ಒಟ್ಟು ₹20 ಸಾವಿರ ಪರಿಹಾರ ಮತ್ತು ಪ್ರಕರಣದ ವೆಚ್ಚ ಪಾವತಿಸುವಂತೆ ಮಹತ್ವದ ಆದೇಶ ನೀಡಿದೆ.

ಈ ಪ್ರಕರಣದಲ್ಲಿ ದೂರುದಾರರ ಪರವಾಗಿ ಹಿರಿಯ ವಕೀಲ ಚಾಂದ್ ಎಸ್. ಅವರು ವಾದ ಮಂಡಿಸಿದ್ದರು.

ಗಣೇಶ ಚತುರ್ಥಿಯಂದು ನಡೆದ ಘಟನೆ

ಶಿವಮೊಗ್ಗ ನಗರದ ಜೆ.ಪಿ.ಎನ್. ರಸ್ತೆ ನಿವಾಸಿ ನಂದೀಶ್ ಅವರು 2025ರ ಆಗಸ್ಟ್ 27ರಂದು ಗಣೇಶ ಚತುರ್ಥಿ ಹಬ್ಬದ ದಿನ ಜೊಮ್ಯಾಟೊ ಆ್ಯಪ್ ಮೂಲಕ ₹313.15 ಪಾವತಿಸಿ ಸಸ್ಯಾಹಾರಿ ಬರ್ಗರ್ ಆರ್ಡರ್ ಮಾಡಿದ್ದರು. ಆದರೆ, ವಿತರಿಸಲಾದ ಆಹಾರವನ್ನು ಪರಿಶೀಲಿಸಿದಾಗ ಅದು ಮಾಂಸಾಹಾರಿ ಬರ್ಗರ್ ಆಗಿರುವುದು ಗೊತ್ತಾಯಿತು.

ಗಣೇಶ ಚತುರ್ಥಿಯಂತಹ ಪವಿತ್ರ ಹಬ್ಬದ ದಿನ ಮನೆಯೊಳಗೆ ಮಾಂಸಾಹಾರಿ ಆಹಾರ ಬಂದಿರುವುದು ತಮ್ಮ ಧಾರ್ಮಿಕ ನಂಬಿಕೆ ಹಾಗೂ ಭಾವನೆಗಳಿಗೆ ಧಕ್ಕೆಯುಂಟು ಮಾಡಿದೆ ಎಂದು ನಂದೀಶ್ ಅವರು ಆರೋಪಿಸಿದರು.

ಹಣ ಹಿಂದಿರುಗಿಸಿದ ಜೊಮ್ಯಾಟೊ, ಆದರೆ...

ಘಟನೆಯ ಬಗ್ಗೆ ಗ್ರಾಹಕರು ಜೊಮ್ಯಾಟೊಗೆ ದೂರು ನೀಡಿದಾಗ, ಸಂಸ್ಥೆಯು ಕೇವಲ ಬರ್ಗರ್‌ಗೆ ಪಾವತಿಸಿದ್ದ ಹಣವನ್ನು ಮರುಪಾವತಿಸಿತು. ಆದರೆ, ಇದರಿಂದ ಉಂಟಾದ ಮಾನಸಿಕ ನೋವು, ಧಾರ್ಮಿಕ ಭಾವನೆಗಳಿಗೆ ಆದ ಆಘಾತ ಹಾಗೂ ಸೇವಾ ನ್ಯೂನತೆಯ ಬಗ್ಗೆ ಯಾವುದೇ ಸಮರ್ಪಕ ಕ್ರಮ ಕೈಗೊಂಡಿಲ್ಲ ಎಂದು ನಂದೀಶ್ ಅಸಮಾಧಾನ ವ್ಯಕ್ತಪಡಿಸಿದರು.

ನಂತರ ವಕೀಲ ಚಾಂದ್ ಎಸ್. ಅವರ ಮೂಲಕ ಶಿವಮೊಗ್ಗ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗಕ್ಕೆ ದೂರು ಸಲ್ಲಿಸಲಾಯಿತು.

ಜೊಮ್ಯಾಟೊ ವಾದವೇನು?

ವಿಚಾರಣೆ ವೇಳೆ ಜೊಮ್ಯಾಟೊ ಪರ ವಕೀಲರು, ತಮ್ಮ ಸಂಸ್ಥೆಯು ಕೇವಲ ಆನ್‌ಲೈನ್ ವೇದಿಕೆಯಾಗಿದ್ದು, ಗ್ರಾಹಕರು ನೇರವಾಗಿ ಹೋಟೆಲ್‌ಗೆ ಆರ್ಡರ್ ನೀಡುತ್ತಾರೆ. ಆಹಾರ ತಯಾರಿಕೆ ಹಾಗೂ ವಿತರಣೆಯಲ್ಲಿನ ಲೋಪಗಳಿಗೆ ಸಂಸ್ಥೆಯನ್ನು ಹೊಣೆಗಾರರನ್ನಾಗಿ ಮಾಡಲು ಸಾಧ್ಯವಿಲ್ಲ ಎಂದು ವಾದ ಮಂಡಿಸಿದರು.

ಅಂದರೆ, ತಾವು ಕೇವಲ ಮಧ್ಯವರ್ತಿಗಳಾಗಿದ್ದು, ಸೇವಾ ನ್ಯೂನತೆ ತಮ್ಮಿಂದ ಆಗಿಲ್ಲ ಎಂದು ಸಂಸ್ಥೆ ತನ್ನ ಜವಾಬ್ದಾರಿಯಿಂದ ಹೊರಬರಲು ಪ್ರಯತ್ನಿಸಿತು.

ಆಯೋಗದ ಮಹತ್ವದ ಅಭಿಪ್ರಾಯ

ದೂರುದಾರರ ಪರವಾಗಿ ಸಲ್ಲಿಸಲಾದ ದಾಖಲೆಗಳು, ಪ್ರಮಾಣಪತ್ರಗಳು ಹಾಗೂ ವಕೀಲ ಚಾಂದ್ ಎಸ್. ಮಂಡಿಸಿದ ವಾದಗಳನ್ನು ಪರಿಶೀಲಿಸಿದ ಜಿಲ್ಲಾ ಗ್ರಾಹಕರ ಆಯೋಗವು, ಗ್ರಾಹಕರಿಗೆ ಸರಿಯಾದ ಆಹಾರ ತಲುಪಿಸುವುದು ಸೇವೆಯ ಭಾಗವಾಗಿದ್ದು, ತಪ್ಪಾದ ಆಹಾರ ವಿತರಿಸಿರುವುದು ಸ್ಪಷ್ಟ ಸೇವಾ ನ್ಯೂನತೆ ಎಂದು ಅಭಿಪ್ರಾಯಪಟ್ಟಿತು.

ಆಯೋಗದ ಆದೇಶ

ಆಯೋಗದ ಅಧ್ಯಕ್ಷ ಟಿ. ಶಿವಣ್ಣ ಹಾಗೂ ಸದಸ್ಯ ಬಿ.ಡಿ. ಯೋಗಾನಂದ ಭಾಂಡ್ಯ ಅವರನ್ನೊಳಗೊಂಡ ಪೀಠವು ಈ ಕೆಳಗಿನಂತೆ ಆದೇಶ ನೀಡಿದೆ:

• ಜೊಮ್ಯಾಟೊ ಸಿಇಒ (ಗುರುಗ್ರಾಮ, ಹರಿಯಾಣ), ಜೋನಲ್ ಹೆಡ್ (ಬೆಂಗಳೂರು) ಹಾಗೂ ಶಿವಮೊಗ್ಗದ ಫೈವ್ ಸ್ಟಾರ್ ಹೋಟೆಲ್ ಮಾಲೀಕರು ಜಂಟಿಯಾಗಿ ಹಾಗೂ ಪ್ರತ್ಯೇಕವಾಗಿ ದೂರುದಾರರಿಗೆ ₹10,000 ಮಾನಸಿಕ ನೋವು ಹಾಗೂ ತೊಂದರೆಗೆ ಪರಿಹಾರವಾಗಿ ಪಾವತಿಸಬೇಕು.
• ಪ್ರಕರಣದ ಕಾನೂನು ವೆಚ್ಚಕ್ಕಾಗಿ ಹೆಚ್ಚುವರಿಯಾಗಿ ₹10,000 ಪಾವತಿಸಬೇಕು.
• ಒಟ್ಟು ₹20,000 ಮೊತ್ತವನ್ನು ಆದೇಶದ ದಿನಾಂಕದಿಂದ 45 ದಿನಗಳೊಳಗೆ ಪಾವತಿಸಬೇಕು.
• ನಿಗದಿತ ಅವಧಿಯಲ್ಲಿ ಹಣ ಪಾವತಿಸದಿದ್ದರೆ, ವಾರ್ಷಿಕ ಶೇ.12ರ ಬಡ್ಡಿಯೊಂದಿಗೆ ಮೊತ್ತವನ್ನು ಪಾವತಿಸಬೇಕೆಂದು ಆಯೋಗ ಆದೇಶಿಸಿದೆ.

ಗ್ರಾಹಕರ ಹಕ್ಕುಗಳಿಗೆ ಬಲ ನೀಡಿದ ತೀರ್ಪು

ಆನ್‌ಲೈನ್ ಆಹಾರ ವಿತರಣೆಯಲ್ಲಿ ತಪ್ಪಾದ ಆಹಾರ ವಿತರಣೆ ಕೇವಲ ಸಾಮಾನ್ಯ ಲೋಪವಲ್ಲ, ಗ್ರಾಹಕರ ಆಯ್ಕೆ, ಧಾರ್ಮಿಕ ನಂಬಿಕೆ ಹಾಗೂ ಭಾವನೆಗಳಿಗೆ ಸಂಬಂಧಿಸಿದ ವಿಷಯವೂ ಆಗಬಹುದು ಎಂಬುದನ್ನು ಈ ತೀರ್ಪು ಮತ್ತೊಮ್ಮೆ ಸ್ಪಷ್ಟಪಡಿಸಿದೆ.

ಈ ತೀರ್ಪು ಇ-ಕಾಮರ್ಸ್ ಹಾಗೂ ಆಹಾರ ವಿತರಣಾ ಸಂಸ್ಥೆಗಳು ಗ್ರಾಹಕರ ಆರ್ಡರ್‌ಗಳನ್ನು ಅತ್ಯಂತ ಜವಾಬ್ದಾರಿಯಿಂದ ನಿರ್ವಹಿಸಬೇಕೆಂಬ ಸಂದೇಶ ನೀಡುವುದರ ಜೊತೆಗೆ, ಸೇವಾ ನ್ಯೂನತೆ ನಡೆದರೆ ಗ್ರಾಹಕರು ಗ್ರಾಹಕರ ಆಯೋಗದ ಮೂಲಕ ನ್ಯಾಯ ಪಡೆಯಬಹುದೆಂಬುದನ್ನು ಒತ್ತಿಹೇಳುವ ಮಹತ್ವದ ನಿರ್ಣಯವಾಗಿದೆ.

Why did Zomato fine the hotel?