SUDDILIVE || SHIVAMOGGA
ಶಿವಮೊಗ್ಗದಲ್ಲಿ ಹಿಂದೂ ಮಹಾಸಭಾ ಗಣಪತಿ ರಾಜಬೀದಿ ಉತ್ಸವಕ್ಕೆ ಅಲಂಕಾರ ಸಮಿತಿಯಿಂದ ಭರದ ಸಿದ್ಧತೆ-Decoration committee in full swing for Hindu Mahasabha Ganapati Rajabeedi Festival in Shivamogga 
ಶಿವಮೊಗ್ಗ: ನಗರದ ಪ್ರಸಿದ್ಧ ಹಿಂದೂ ಮಹಾಸಭಾ ಗಣಪತಿ ರಾಜಬೀದಿ ಉತ್ಸವಕ್ಕೆ ಸಿದ್ಧತೆಗಳು ಭರದಿಂದ ಸಾಗುತ್ತಿದ್ದು, ಈ ಬಾರಿ ನಗರದ ಪ್ರಮುಖ ವೃತ್ತಗಳು, ರಸ್ತೆಗಳ ಪ್ರವೇಶದ್ವಾರಗಳು ಹಾಗೂ ಹೊರಭಾಗದ ಮಾರ್ಗಗಳಲ್ಲಿ ವಿಶೇಷ ಮಹಾದ್ವಾರಗಳು ನಿರ್ಮಾಣವಾಗುತ್ತಿವೆ.
ಉತ್ಸವದ ಅಂಗವಾಗಿ ಅಮೀರ್ ಅಹಮದ್ ವೃತ್ತ, ಗಾಂಧಿ ಬಜಾರ್ನ ಮುಖ್ಯದ್ವಾರ, ಶಿವಪ್ಪನಾಯಕ ಪ್ರತಿಮೆ ಎದುರು, ಎಎ ವೃತ್ತದಿಂದ ನೆಹರೂ ರಸ್ತೆ ಪ್ರವೇಶಿಸುವ ಭಾಗ ಸೇರಿದಂತೆ ನಗರದ ಪ್ರಮುಖ ಸ್ಥಳಗಳಲ್ಲಿ ವೈಶಿಷ್ಟ್ಯಪೂರ್ಣ ಅಲಂಕಾರ ಹಾಗೂ ಮಹಾದ್ವಾರಗಳನ್ನು ನಿರ್ಮಿಸಲಾಗುತ್ತಿದೆ.
ಶಿವಾಜಿ ಮಹಾರಾಜರಿಗೆ ತುಳಜಾಭವಾನಿ ದೇವಿಯಿಂದ ಖಡ್ಗ
ಈ ಬಾರಿಯ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿ ಅಂಬಾಭವಾನಿ ಅಥವಾ ತುಳಜಾಭವಾನಿ ದೇವಿಯು ಶಿವಾಜಿ ಮಹಾರಾಜರಿಗೆ ಖಡ್ಗ ನೀಡುತ್ತಿರುವ ದೃಶ್ಯ ರೂಪಿಸಲಾಗುತ್ತಿದೆ. ಹಿಂದೂವಿ ಸಾಮ್ರಾಜ್ಯ ಹಾಗೂ ಧರ್ಮಸ್ಥಾಪನೆಗಾಗಿ ಶಿವಾಜಿ ಮಹಾರಾಜರು ಕೈಗೊಂಡ ಸಂಕಲ್ಪವನ್ನು ಪ್ರತಿಬಿಂಬಿಸುವ ರೀತಿಯಲ್ಲಿ ಈ ಅಲಂಕಾರವನ್ನು ಸಿದ್ಧಪಡಿಸಲಾಗುತ್ತಿದೆ.
ಅಮ್ಮನವರು ಶಿವಾಜಿ ಮಹಾರಾಜರಿಗೆ ಖಡ್ಗ ನೀಡಿ, ಧರ್ಮಸ್ಥಾಪನೆಯ ಕಾರ್ಯಕ್ಕೆ ಆಶೀರ್ವದಿಸಿ ಕಳುಹಿಸುವ ಕಲ್ಪನೆಯನ್ನು ಈ ಮಹಾದ್ವಾರದಲ್ಲಿ ಮೂಡಿಸಲಾಗುತ್ತಿದೆ ಎಂದು ಹಿಂದೂ ಅಲಂಕಾರ ಸಮಿತಿಯ ಧೀನ್ ದಯಾಳು ಸುದ್ದಿಲೈವ್ ಗೆ ತಿಳಿಸಿದ್ದಾರೆ. ಈ ಅಲಂಕಾರವನ್ನ ಭದ್ರಾವತಿಯ ವಿಷ್ಣು ಎಂಬುವರು ರಚಿಸಿರುವುದಾಗಿ ಅವರು ತಿಳಿಸಿದ್ದಾರೆ.
ಗಾಂಧಿ ಬಜಾರ್ನಲ್ಲಿ ಪಂಚಮುಖಿ ಆಂಜನೇಯನ ವಿಶೇಷ ವಿನ್ಯಾಸ
ಗಾಂಧಿ ಬಜಾರ್ನ ಮುಖ್ಯ ಮಹಾದ್ವಾರದಲ್ಲಿ ಪಂಚಮುಖಿ ಆಂಜನೇಯನ ವಿಶೇಷ ವಿನ್ಯಾಸ ರೂಪಿಸಲಾಗುತ್ತಿದೆ. ಆಂಜನೇಯನ ಎದೆಯೊಳಗೆ ಹೃದಯದಲ್ಲಿರುವ ಶ್ರೀರಾಮನ ದರ್ಶನವಾಗುವ ರೀತಿಯಲ್ಲಿ ಆತ್ಮರಾಮನ ಕಲ್ಪನೆಯನ್ನು ಬಿಂಬಿಸಲು ಸಿದ್ಧತೆ ನಡೆದಿದೆ.
ಮೇಲ್ಭಾಗದಲ್ಲಿ ಆಂಜನೇಯನ ಒಂದು ಮುಖ ಹಾಗೂ ಕೆಳಭಾಗದಲ್ಲಿ ಉಳಿದ ನಾಲ್ಕು ಮುಖಗಳು ಕಾಣುವಂತೆ ವಿನ್ಯಾಸ ಮಾಡಲಾಗುತ್ತಿದೆ. ಇದರೊಂದಿಗೆ ಭಕ್ತರಿಗೆ ವಿಭಿನ್ನ ಅನುಭವ ನೀಡುವ ರೀತಿಯಲ್ಲಿ ಮಹಾದ್ವಾರವನ್ನು ನಿರ್ಮಿಸಲಾಗುತ್ತಿದೆ.
ಈ ಮಹಾದ್ವಾರಕ್ಕೆ ಸಂಬಂಧಿಸಿದ ಆಂಜನೇಯನ ವಿಗ್ರಹವನ್ನು ಶಿವಮೊಗ್ಗದ ಖ್ಯಾತ ಶಿಲ್ಪಿ ಜೀವನ್ ಅವರ ತಂಡ ಸಿದ್ಧಪಡಿಸುತ್ತಿದ್ದು, ಸೆ.22ರ ಸಂಜೆ ವೇಳೆಗೆ ವಿಗ್ರಹ ಶಿವಮೊಗ್ಗಕ್ಕೆ ಆಗಮಿಸುವ ನಿರೀಕ್ಷೆ ಇದೆ. ಬಳಿಕ ಮಹಾದ್ವಾರದಲ್ಲಿ ವಿಗ್ರಹ ಅಳವಡಿಕೆ ಸೇರಿದಂತೆ ಉಳಿದ ಕಾಮಗಾರಿಗಳು ನಡೆಯಲಿವೆ.
ಶಿವಪ್ಪನಾಯಕ ಪ್ರತಿಮೆ ಎದುರು ಪುರಿ ಜಗನ್ನಾಥ ಮಹಾದ್ವಾರ
ಹೂವಿನ ಮಾರುಕಟ್ಟೆ ಸಮೀಪದ ಶಿವಪ್ಪನಾಯಕ ಪ್ರತಿಮೆ ಎದುರು, ಹಿಂದಿನ ವರ್ಷ ಧರ್ಮಸ್ಥಳದ ಮಾದರಿಯ ಮಹಾದ್ವಾರ ನಿರ್ಮಿಸಿದ್ದ ಸ್ಥಳದಲ್ಲಿ ಈ ಬಾರಿ ಪುರಿ ಜಗನ್ನಾಥ ಮಹಾದ್ವಾರ ನಿರ್ಮಿಸಲಾಗುತ್ತಿದೆ.
ಪುರಿ ಜಗನ್ನಾಥನಿಗೆ ಸಂಬಂಧಿಸಿದ ಮೂರು ರಥಗಳ ವಿನ್ಯಾಸವನ್ನು ಒಳಗೊಂಡಂತೆ ಮಹಾದ್ವಾರವನ್ನು ಸಿದ್ಧಪಡಿಸಲಾಗುತ್ತಿದ್ದು, ಭಕ್ತರಿಗೆ ಜಗನ್ನಾಥನ ರಥೋತ್ಸವದ ಕಲ್ಪನೆಯನ್ನು ಪರಿಚಯಿಸುವ ರೀತಿಯಲ್ಲಿ ಅಲಂಕಾರ ರೂಪಿಸಲಾಗುತ್ತಿದೆ.
ನೆಹರೂ ರಸ್ತೆ ಪ್ರವೇಶದಲ್ಲಿ 'ವಂದೇ ಮಾತರಂ' ಮಹಾದ್ವಾರ
ನೆಹರೂ ರಸ್ತೆಯ ಪ್ರವೇಶ ಭಾಗದಲ್ಲೂ ವಿಶೇಷ ಮಹಾದ್ವಾರ ನಿರ್ಮಿಸಲಾಗುತ್ತಿದ್ದು, ಅದಕ್ಕೆ 'ವಂದೇ ಮಾತರಂ ಮಹಾದ್ವಾರ' ಎಂದು ಹೆಸರಿಡಲಾಗಿದೆ.
ಇದರ ಜೊತೆಗೆ ನಗರದ ವಿವಿಧ ವೃತ್ತಗಳು ಹಾಗೂ ಪ್ರಮುಖ ಸ್ಥಳಗಳಲ್ಲಿ ಧಾರ್ಮಿಕ ಮತ್ತು ರಾಷ್ಟ್ರೀಯ ಭಾವನೆಗಳನ್ನು ಪ್ರತಿಬಿಂಬಿಸುವ ವಿವಿಧ ವಿನ್ಯಾಸಗಳನ್ನು ಅಳವಡಿಸಲಾಗುತ್ತಿದೆ.
ನಗರದ ಹೊರಭಾಗದಲ್ಲೂ ಎಂಟು ಸ್ವಾಗತ ಮಹಾದ್ವಾರ
ಹಿಂದೂ ಮಹಾಸಭಾ ಗಣಪತಿ ಉತ್ಸವಕ್ಕೆ ಶಿವಮೊಗ್ಗ ನಗರಕ್ಕೆ ವಿವಿಧ ಮಾರ್ಗಗಳಿಂದ ಆಗಮಿಸುವ ಭಕ್ತರನ್ನು ಸ್ವಾಗತಿಸುವ ಉದ್ದೇಶದಿಂದ ನಗರದ ಹೊರಭಾಗದ ಸುಮಾರು ಎಂಟು ಪ್ರಮುಖ ಪ್ರವೇಶ ಮಾರ್ಗಗಳಲ್ಲಿ ಸ್ವಾಗತ ಮಹಾದ್ವಾರಗಳನ್ನು ನಿರ್ಮಿಸಲಾಗುತ್ತಿದೆ.
ನವುಲೆ–ಶಿಕಾರಿಪುರ ಮಾರ್ಗ, ಹೊನ್ನಾಳಿ ಭಾಗ, ತೀರ್ಥಹಳ್ಳಿ ಹಾಗೂ ಭದ್ರಾವತಿ ಕಡೆಯಿಂದ ಶಿವಮೊಗ್ಗ ನಗರ ಪ್ರವೇಶಿಸುವ ಪ್ರಮುಖ ಮಾರ್ಗಗಳು ಸೇರಿದಂತೆ ವಿವಿಧ ಪ್ರವೇಶ ಸ್ಥಳಗಳಲ್ಲಿ ಮಹಾದ್ವಾರಗಳನ್ನು ನಿರ್ಮಿಸಲು ತೀರ್ಮಾನಿಸಿರುವುದಾಗಿ ಅವರು ತಿಳಿಸಿದ್ದಾರೆ.
ಈ ಮಹಾದ್ವಾರಗಳಿಗೆ ಧರ್ಮಸ್ಥಾಪನೆ ಹಾಗೂ ರಾಷ್ಟ್ರಕ್ಕಾಗಿ ಹೋರಾಟ ಮಾಡಿದ, ತ್ಯಾಗ ಮತ್ತು ಬಲಿದಾನ ಮಾಡಿದ ರಾಷ್ಟ್ರೀಯ ಮಹಾಪುರುಷರ ಹೆಸರನ್ನು ನೀಡಲಾಗುತ್ತಿದೆ. ಹೊರಭಾಗದಿಂದ ನಗರಕ್ಕೆ ಪ್ರವೇಶಿಸುವ ಭಕ್ತರಿಗೆ ವಿಶೇಷ ಸ್ವಾಗತದ ಅನುಭವ ನೀಡುವ ರೀತಿಯಲ್ಲಿ ಮಹಾದ್ವಾರಗಳನ್ನು ರೂಪಿಸಲಾಗುತ್ತಿದೆ.
ಶಿವಾಜಿ–ಅಂಬಾಭವಾನಿ ವಿನ್ಯಾಸಕ್ಕೆ ಭದ್ರಾವತಿ ಶಿಲ್ಪಿ ವಿಷ್ಣು
ನಗರದ ಮತ್ತೊಂದು ಪ್ರಮುಖ ವೃತ್ತದಲ್ಲಿ ಶಿವಾಜಿ ಮಹಾರಾಜರು, ಅಂಬಾಭವಾನಿ ಹಾಗೂ ಸಿಂಹದ ವಿನ್ಯಾಸವನ್ನು ಒಳಗೊಂಡ ಕಲಾಕೃತಿ ಸಿದ್ಧವಾಗುತ್ತಿದೆ. ಈ ಕಲಾಕೃತಿಯನ್ನು ಭದ್ರಾವತಿಯ ಶಿಲ್ಪಿ ವಿಷ್ಣು ಅವರು ರೂಪಿಸುತ್ತಿದ್ದಾರೆ.
ಇನ್ನು ಗಾಂಧಿ ಬಜಾರ್ನ ಪ್ರಮುಖ ಮಹಾದ್ವಾರಕ್ಕೆ ಸಂಬಂಧಿಸಿದ ವಿಗ್ರಹ ಹಾಗೂ ಕಲಾಕೃತಿಗಳ ನಿರ್ಮಾಣದ ಜವಾಬ್ದಾರಿಯನ್ನು ಶಿವಮೊಗ್ಗದ ಶಿಲ್ಪಿ ಜೀವನ್ ಅವರಿಗೆ ನೀಡಲಾಗಿದೆ. ಹೀಗೆ ಶಿವಮೊಗ್ಗ ಮತ್ತು ಭದ್ರಾವತಿಯ ಇಬ್ಬರು ಶಿಲ್ಪಿಗಳು ಉತ್ಸವದ ಪ್ರಮುಖ ಕಲಾಕೃತಿಗಳ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿದ್ದಾರೆ.
ಒಟ್ಟಾರೆ, ಈ ಬಾರಿ ಹಿಂದೂ ಮಹಾಸಭಾ ಗಣಪತಿ ರಾಜಬೀದಿ ಉತ್ಸವದ ಅಂಗವಾಗಿ ನಗರದ ಪ್ರಮುಖ ಸ್ಥಳಗಳು ಹಾಗೂ ಪ್ರವೇಶ ಮಾರ್ಗಗಳು ವಿಭಿನ್ನ ಮಹಾದ್ವಾರಗಳು ಮತ್ತು ಕಲಾಕೃತಿಗಳಿಂದ ಕಂಗೊಳಿಸಲಿದ್ದು, ಉತ್ಸವದ ಸಿದ್ಧತೆಗಳು ಈಗಾಗಲೇ ವೇಗ ಪಡೆದುಕೊಂಡಿವೆ.
