ಲಿಂಗನಮಕ್ಕಿ, ಭದ್ರಾ, ತುಂಗಾ ಜಲಾಶಯಗಳಿಗೆ ಒಳಹರಿವು ಹೆಚ್ಚಳ- Inflow to Linganamakki, Bhadra, Tunga reservoirs increases

bySurendrasoori •ಜುಲೈ 04, 2026

0

SUDDILIVE || SHIVAMOGGA

ಲಿಂಗನಮಕ್ಕಿ, ಭದ್ರಾ, ತುಂಗಾ ಜಲಾಶಯಗಳಿಗೆ ಒಳಹರಿವು ಹೆಚ್ಚಳ- Inflow to Linganamakki, Bhadra, Tunga reservoirs increases

ಶಿವಮೊಗ್ಗ, ಜು. 4: ಮಲೆನಾಡು ಭಾಗದಲ್ಲಿ ಕಳೆದ ಕೆಲವು ದಿನಗಳಿಂದ ಮಳೆ ಮುಂದುವರಿದಿರುವ ಪರಿಣಾಮ ಶಿವಮೊಗ್ಗ ಜಿಲ್ಲೆಯ ಪ್ರಮುಖ ಜಲಾಶಯಗಳಾದ ಲಿಂಗನಮಕ್ಕಿ, ಭದ್ರಾ ಹಾಗೂ ತುಂಗಾ ಜಲಾಶಯಗಳಿಗೆ ಒಳಹರಿವಿನಲ್ಲಿ ಹೆಚ್ಚಳ ಕಂಡುಬಂದಿದೆ. ಆದಾಗ್ಯೂ, ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಜಲಾಶಯಗಳ ನೀರಿನ ಮಟ್ಟ ಇನ್ನೂ ಕಡಿಮೆಯೇ ಇದೆ..

ಜುಲೈ 4ರ ವರದಿಯ ಪ್ರಕಾರ, ತುಂಗಾ ಜಲಾಶಯದ ಗರಿಷ್ಠ ಮಟ್ಟ 588.24 ಮೀಟರ್ ಆಗಿದ್ದು, ಪ್ರಸ್ತುತ ನೀರಿನ ಮಟ್ಟ 588.11 ಮೀಟರ್ ದಾಖಲಾಗಿದೆ.

ಜಲಾಶಯದ ಒಟ್ಟು ಮರುಸಂಗ್ರಹ ಸಾಮರ್ಥ್ಯ 3.24 ಟಿಎಂಸಿ ಆಗಿದ್ದು, ಪ್ರಸ್ತುತ ಒಟ್ಟು ನೀರಿನ ಸಂಗ್ರಹಣೆ 3.168 ಟಿಎಂಸಿ ತಲುಪಿದೆ. ಬಳಕೆಯಾಗುವ (ಲೈವ್) ಸಾಮರ್ಥ್ಯ 2.411 ಟಿಎಂಸಿ ಇದ್ದು, ಸದ್ಯ 2.339 ಟಿಎಂಸಿ ಲೈವ್ ಸ್ಟೋರೇಜ್ ಲಭ್ಯವಿದೆ. ಜಲಾಶಯದ ಡೆಡ್ ಸ್ಟೋರೇಜ್ ಪ್ರಮಾಣ 0.829 ಟಿಎಂಸಿ ಆಗಿದೆ.

ನದಿ ಪಾತ್ರದಲ್ಲಿ ಸುರಿಯುತ್ತಿರುವ ಮಳೆಯಿಂದಾಗಿ ಜಲಾಶಯಕ್ಕೆ ಒಟ್ಟು 6,147 ಕ್ಯೂಸೆಕ್ ನೀರು ಒಳಹರಿದು ಬರುತ್ತಿದೆ. ಇದರಲ್ಲಿ 4,912 ಕ್ಯೂಸೆಕ್ ನೀರು ನದಿಯ ಮೂಲಕವೇ ಹರಿದುಬರುತ್ತಿದೆ. ಜಲಾಶಯದಿಂದ ಒಟ್ಟು 6,020 ಕ್ಯೂಸೆಕ್ ನೀರನ್ನು ವಿವಿಧ ಮೂಲಗಳಿಗೆ ಹೊರಬಿಡಲಾಗುತ್ತಿದೆ.

ಕಳೆದ ವರ್ಷ ಇದೇ ದಿನಾಂಕದಲ್ಲಿ ತುಂಗಾ ಜಲಾಶಯಕ್ಕೆ 56,926 ಕ್ಯೂಸೆಕ್ ಒಳಹರಿವು ಹಾಗೂ 67,990 ಕ್ಯೂಸೆಕ್ ಹೊರಹರಿವು ದಾಖಲಾಗಿದ್ದು, ಈ ಬಾರಿ ಅದರೊಂದಿಗೆ ಹೋಲಿಸಿದರೆ ಒಳಹರಿವು ಮತ್ತು ಹೊರಹರಿವು ಗಮನಾರ್ಹವಾಗಿ ಕಡಿಮೆಯಾಗಿದೆ.

ಲಿಂಗನಮಕ್ಕಿ ಜಲಾಶಯದ ಗರಿಷ್ಠ ಮಟ್ಟ 1819 ಅಡಿಗಳಾಗಿದ್ದು, ಶನಿವಾರದಂದು ಜಲಮಟ್ಟ 1748.45 ಅಡಿಗಳಷ್ಟಿದೆ. ಕಳೆದ ವರ್ಷ ಇದೇ ದಿನ 1789.45 ಅಡಿ ದಾಖಲಾಗಿತ್ತು. ಜಲಾಶಯದ ಒಟ್ಟು 151.64 ಟಿಎಂಸಿ ಸಾಮರ್ಥ್ಯದಲ್ಲಿ ಪ್ರಸ್ತುತ 16.99 ಟಿಎಂಸಿ (ಶೇ. 11.20) ನೀರು ಸಂಗ್ರಹವಾಗಿದೆ. ಜಲಾಶಯಕ್ಕೆ 7,950 ಕ್ಯೂಸೆಕ್ ನೀರು ಹರಿದು ಬರುತ್ತಿದ್ದು, 2,857 ಕ್ಯೂಸೆಕ್ ನೀರನ್ನು ಹೊರಬಿಡಲಾಗುತ್ತಿದೆ. ಕಳೆದ 24 ಗಂಟೆಗಳಲ್ಲಿ 8 ಮಿ.ಮೀ. ಮಳೆಯಾಗಿದೆ.

ಭದ್ರಾ ಜಲಾಶಯದ ಗರಿಷ್ಠ ಮಟ್ಟ 186 ಅಡಿಗಳಾಗಿದ್ದು, ಪ್ರಸ್ತುತ ನೀರಿನ ಮಟ್ಟ 138 ಅಡಿಗಳಷ್ಟಿದೆ. ಕಳೆದ ವರ್ಷ ಇದೇ ದಿನ 167 ಅಡಿ 1 ಇಂಚು ದಾಖಲಾಗಿತ್ತು. ಒಟ್ಟು 71.535 ಟಿಎಂಸಿ ಸಾಮರ್ಥ್ಯ ಹೊಂದಿರುವ ಜಲಾಶಯದಲ್ಲಿ 25.543 ಟಿಎಂಸಿ ನೀರು ಸಂಗ್ರಹವಾಗಿದೆ. ಜಲಾಶಯಕ್ಕೆ 2,108 ಕ್ಯೂಸೆಕ್ ಒಳಹರಿವು ಇದ್ದು, 210 ಕ್ಯೂಸೆಕ್ ನೀರನ್ನು ಹೊರಹರಿಸಲಾಗುತ್ತಿದೆ.

ಮುಂದಿನ ದಿನಗಳಲ್ಲಿಯೂ ಮಲೆನಾಡು ಪ್ರದೇಶದಲ್ಲಿ ಉತ್ತಮ ಮಳೆಯ ಮುನ್ಸೂಚನೆ ಇರುವುದರಿಂದ ಜಿಲ್ಲೆಯ ಪ್ರಮುಖ ಜಲಾಶಯಗಳ ನೀರಿನ ಮಟ್ಟ ಮತ್ತಷ್ಟು ಏರಿಕೆಯಾಗುವ ನಿರೀಕ್ಷೆಯಿದೆ.